Milani ndjen nevojën të blejë një sulmues të ri për t’iu bashkuar Zlatan Ibrahimovicit. Aventura e Mario Mandzukic me kuqezinjtë është e destinuar të përfundojë në fund të sezonit. Emri i Olivier Zhirusë ka dalë sërish në skenë.
Kroati do të largohet në fund të sezonit dhe drejtuesit e Milanit do të kërkojnë një sulmues të aftë për të garantuar gola dhe të jetë gati, kur Ibra të mungojë. Është folur shumë për Dushan Vlahoviçin, i cili sigurisht që është një profil shumë i pëlqyer në Milanelo. Sidoqoftë, duhen shumë para dhe pa të ardhurat që vijnë nga pjesëmarrja në Champions League transferimi do të ishte shumë i komplikuar.
Prandaj, klubi kuqezi mund të vendosë të përqendrohet tek ndonjë transferim falas: “Nga sa kuptoj Olivier Zhiru mund të jetë një blerje e mundshme për Milanin – thotë Karlo Pelegati, gazetar pranë Milanit -, ai mund të jetë protagonist për 2 -3 vite në Milano. Thashethemet nga Anglia janë konfirmuar dhe nuk ka vetëm opsionin Milan por edhe Inter dhe Lacio ”. Zhiru do të largohet nga Çelsi në 30 qershor, por në verë ai do të thirret për të mbrojtur ngjyrat e ekipit kombëtar në Kampionatin Evropian, kështu që ndoshta një transferim i mundshëm pritet pas Europianit.
