Deputeti nga radhët e partisë ‘Nisma Socialdemokrate’, Milaim Zeka, sot pritet që të dalë në gjyq, lidhur me akuzat për ‘mashtrim e pastrim të parave’.
Së bashku me Zekën në këtë proces gjyqësor të akuzuar janë edhe Ilir Krasniqi e Edmond Kërliu.
Prokuroria Speciale e Kosovës ka ngritur akt-akuzë pranë Gjykatës Themelore në Prishtinë, Departamenti i Krimeve të Rënda, kundër të pandehurve Ilir Krasniqi, Milaim Zeka dhe Edmond Kërliu.
Ata akuzohen për veprat penale ‘mashtrimi’, ‘shmangia nga tatimi’ si dhe për veprën penale ‘pastrimi i parave’.
Sipas akt-akuzës së Prokurorisë Speciale, të pandehurit Ilir Krasniqi dhe Milaim Zeka, që nga viti 2016 e deri në mars të vitit 2017, me qëllim të përfitimit të kundërligjshëm pasuror, fillimisht të pandehurit e lartcekur më 02.06.2016, kanë regjistruar biznesin si agjenci punësimi. Ku kanë paraqitur fakte të rreme për punësimin e qytetarëve të Kosovës në Gjermani. Të pandehurit Ilir Krasniqi dhe Milaim Zeka, kanë mashtruar 900 aplikues për viza pune.
Të pandehurit, Prokuroria i akuzon si bashkëpunëtorë. Po kështu ata kanë kanë kryer edhe veprën penale ‘shmangia nga tatimi’.
