Pandeli alias Pano Kokoveshi, i arrestuar dje në Himarë bashkë me Fredi Belerin, është dërguar me urgjencë në Qendrën Spitalore “Nënë Tereza”, pas problemeve me zemrën. Ai ka kërkuar mjek duke thënë se kishte probleme me zemrën.
Është vendosur që ai të dërgohet me ambulancë në Tiranë nga Vlora, ku prej ditës së djeshme qëndronte në paraburgim.
Efektivë të Policisë së Shtetit kanë shoqëruar Pandeli Kokoveshin drejt QSUT, aty ku ky shtetas po i nënshtrohet të gjitha ekzaminimeve të nevojshme. Prokuroria e Vlorës e akuzon atë dhe Fredi Belerin, kandidat i koalicionit “Bashkë Fitojmë” për Himarën, për blerje votash.
Ata janë ndaluar dje pak pas mesnate në Himarë, pasi një agjent i infiltruar ka përgjuar pazarin për vota. Sipas informacioneve paraprake, Beleri do të paguante 400 mijë lekë të vjetra për 8 vota. Ndërkohë, Prokuroria thotë se ka prova, se Fredi Beleri ka premtuar dhe ka dhënë para.
