Zbardhet motivi i ekzekutimit me armë të ish-kryekomisarit, Artan Cuku. Sipas policisë, Mikel Shallari e ka vrarë Cukun për motive gjakmarrjeje.
Dyshohet se krimi u porosit nga një burg jashtë vendit, ndërsa po hetohen disa pista që mund të çojnë në zbardhjen e ngjarjes dhe identifikimin e personave që urdhëruan vrasjen.
Mësohet se 24-vjeçari ka pranuar të bashkëpunojë me drejtësinë, por me kushtin që t’i sigurohet familja.
Burime për Report Tv, saktësuan se Shallari është treguar i gatshëm të nxjerrë emrat e porositësve të vrasjes së kryer nga vetë ai mbrëmjen e 8 prillit në Tiranë.
Ai kërkon garanci për familjen si dërgimi në një vend jashtë Shqipërisë dhe ndërrimi i identiteteve, për t’iu shmangur një hakmarrje të mundshme nga urdhëruesit e atentatit.
Sipas të dhënave të policisë, Shallari ka marrë 25 mijë euro, ndërsa dyshohet se e ka kryer vrasjen në bashkëpunim, krim për të cilin rrezikon të dënohet me jo më pak se 30 vite burgim.
