Jose Mourinho është shfaqur ndryshe në konferencën për shtyp para ndeshjes me Huddersfield. Këta të fundit kanë mposhtur “Djajtë” në ndeshjen e fazës së parë dhe kjo do të jetë si një sfidë hakmarrje. Por më i rëndësishëm ishte fakti që më në fund edhe Mou e pranoi faktin që gara për titull ishte mbyllur dhe se tani objektivi është ta mbyllin kampionatin të dytët në renditje. United u mposht nga Tottenham në mesjavë dhe tani ka 15 pikë më pak se Manchester City, kur mbeten edhe 13 ndeshje nga fundit.
“Ne na duhen pikë për të qenë të parët nga të fundit. Duhet të përpiqemi në të gjitha mënyrat ta mbyllim kampionatin në vendin e dytë, pozicion që e kemi mbajtur nga fillimi dhe deri tani. Që nga javët e para kemi qenë ne skuadra e renditur pas City dhe nuk kemi qenë kurrë në vend të katërt, pestë ose gjashtë. Na takon ta mbrojmë këtë vend.”-deklaroi Mourinho.
Një vendim mjaft i vështirë për “Special One”, i cili ka fituar shumë trofe dhe është mësuar të luftojë deri në sekondat e fundit. Ai shtoi faktin që City ka qenë më superiorë që nga fillimi i kampionatit, por e ka favorizuar triumfi në disa ndeshje që nuk e kishin merituar fitoren. United është duke luajtur mjaft mirë dhe është përmirësuar ndjeshëm nga një vit më parë dhe në pozitat që është duhet të ishte duke luftuar për titull.
“Kam ndjesinë se City po ecën aq mirë sa do të jenë kampionë të Anglisë. Ata nuk i kanë lënë skuadrat e tjera të afrohen sepse kanë fituar edhe në ndeshje që nuk kanë luajtur më mirë se kundërshtari. Personalisht mendoj se jemi përmirësuar në krahasim me një vit më parë dhe në çdo sezon do të ishim në garë për titullin me këtë numër pikësh, por këtë herë City ka një ritëm të jashtëzakonshëm. Tottenham, Liverpool dhe Chelsea nuk kanë bërë një kampionat të keq, ashtu si ne, por fakti që Manchester City ka fituar edhe me fat në ndeshje të caktuara e ka mbyllur garën për titull,”-përfundoi Mourinho.
