Në sallën e Parlamentit ishin të pranishëm 89 deputetë për zgjedhjen e Presidentit. Pas votimit, rezultati tregoi se 87 deputetë ishin pro kandidatit Ilir Meta për president. Dy deputetët, Ben Blushi dhe Mimoza Hafizi, votuan kundër kësaj kandidature. Asnjë nga deputetët nuk abstenoi. Vetëm në raundin e katër, Parlamenti arriti që të kishte një kandidaturë për Kreun e Shtetit. Kandidatura e Metës erdhi si propozim i LSI-së dhe mori mbështetjen e Partisë Socialiste. Meta u propozua në Kuvend nga 23 deputetë dhe figura e tij kaloi me sukses Komisionin e Ligjeve.
Presidenti i sapozgjedhur në fjalën e tij tha se do të bëjë përpjekje maksimale që situata në vend të mos arrijë të tensionohet, ashtu si në Maqedoni. Meta tha se gjithmonë është i gatshëm që të zgjedhë në favor të demokracisë dhe jo të posteve shtetërore, dhe se ka pranuar postin e Presidentit për një demokraci më të mirë. Presidenti i ri tha se do të bëjë të pamundurën për të merituar besimin e dhënë nga kolegët deputetë.
Ilir Meta do të jetë President nga viti 2017 deri më 2022.
