Presidenti i zgjedhur, Ilir Meta, i ftuar në emisionin “Studio e Hapur”, ka komentuar për koalicionin parazgjedhor që LSI-ja nuk arriti me Partinë Socialiste.
Meta u shpreh se “nuk ka pasur asnjë ftesë serioze për koalicion nga ana e Partisë Socialiste, por ka pasur vetëm fjalë, por jo ftesë zyrtare formale. Kjo nuk përbën asnjë lloj shqetësimi për Lëvizjen Socialiste për Integrim sepse kjo na bën më të fortë. Nuk ka pasur ftese dhe asnjëherë refuzim nga ana e Partisë Socialiste. Aktualisht LSI-ja është në koalicion me PS-në për atë që është arritur më 1 prill 2013.”
“Në qoftë se kemi një koalicion me bazë të gjerë të arritur mes Partisë Demokratike dhe Partisë Socialiste, është një lajm i mirë. Të njëjtën gjë bën edhe gjermania dhe partitë e saj politike kur nuk arrijnë marrëveshje me partitë e vogla të spektrit të tyre. Formula pa koalicione e forcon LSI-në. Do të ishte nder për LSI-në të ishte opozitë në qoftë se do të kishte një koalicion me bazë të gjerë ndërmjet PD-së dhe PS-së. Sigurisht që do të ishim një opozitë e fortë”, thotë Meta.
