Presidenti Meta ka zhvilluar një vizitë në Gjermani, ku u prit nga presidenti gjerman, Frank-Walter Steinmeier.
Kjo vizitë përkon me 30-vjetorin e rivendosjes së marrëdhënieve diplomatike mes Shqipërisë dhe Gjermanisë.
Të dy presidentët dhanë një konferencë për shtyp pas pritjes ceremoniale në pallatin presidencial dhe takimit zyrtar, ku mori pjesë dhe Ministri i Shtetit për Evropën në Ministrinë e Jashtme të Gjermanisë, zoti Michael Roth.
Gjatë fjalës së tij, presidenti Meta deklaroi se kjo vizitë do i shërbejë forcimit të mëtejshëm të marrëdhënieve mes dy vende, si dhe shprehu mirënjohjen ndaj Gjermanisë për mbështetjen dhe ndihmën që ajo i ka dhënë Shqipërisë dhe shqiptarëve në procesin e integrimit në Bashkimin Evropian dhe në anëtarësimin në NATO.
Të dy presidentët vlerësuan mbylljen e procedurave të ratifikimit nga të dy palët të marrëveshjes në fushën e sigurimeve shoqërore.
Presidenti Meta e siguroi presidentin Steinmeier për vazhdimësinë e zbatimin të reformës në drejtësi, si një prioritetet i qenësishëm për të ndërtuar një sistem gjyqësor funksional e për pasojë krijimin e një klimë më të mirë për bizneset dhe investimet vendase e të huaja, si dhe u theksua nevoja e nxitjes së bizneseve dhe investitorëve gjermanë për të zgjeruar bashkëpunimin e tyre me Shqipërinë e për të rritur praninë e tyre në aspekte të ndryshme të jetës në vendin tonë.
Për sa i përket bashkëpunimit rajonal, Meta u ndal veçanërisht në impaktin e rëndësishëm të Procesit të Berlinit për Shqipërinë si dhe vendet e Ballkanit Perëndimor, krijimin e një rajoni bashkëpunues, të sigurt, të qëndrueshme, të emancipuar dhe integrimin e tij në Bashkimin Evropian.
Nga ana tjetër, presidenti gjerman Steinmeier vlerësoi rolin e rëndësishëm të Shqipërisë, si faktor stabiliteti në rajon dhe si partner i besueshëm në luftën kundër terrorizmit ndërkombëtar, krimit të organizuar dhe ekstremizmit të dhunshëm.
Presidenti Meta e ftoi gjithashtu Steinmeier për një vizitë zyrtare në Shqipëri, ftesë që u prit me kënaqësi.
