Takimi i ditës së djeshme mes kryeministrit Rama dhe kryetarit të Parlamentit, Ilir Meta, ka dështuar.
Sipas gazetës së përditshmes, “Panorama”, bëhet me dije se takimi i nivelit të lartë politik mes dy partive të koalicionit qeverisës nuk ka arritur në një marrëveshje, ndonëse ofertës së kryeministrit, kryeparlamentari Meta i është përgjigjur pozitivisht.
Sipas këtyre burimeve, kryeministri Rama, që në nisje të takimit, i ka kërkuar bashkëkryetarit Meta të firmosë marrëveshjen për vijim të koalicionit edhe në zgjedhjet e 18 qershorit.
Por, kreu i LSI-së i ka konfirmuar Kryeministrit Rama se për të firmosur marrëveshjen e koalicionit nuk ka asnjë pengesë dhe se ajo mund të firmoset në çdo moment, por problem mbetet kriza politike dhe bojkoti i zgjedhjeve të opozitës.
Gjithashtu, edhe për çështjen e Presidentit, kreu i LSI-së ka kërkuar më parë gjetjen e zgjidhjes së krizës me PD-në dhe aleatët e saj.
Dje në “Hotel Tirana International”, në takimin mes dy partive të koalicionit qeverisës, Kryeministri Rama ishte i shoqëruar nga kryetari i grupit parlamentar socialist, Gramoz Ruçi, dhe sekretari i përgjithshëm i Kryeministrisë, Engjëll Agaçi, ndërsa Ilir Meta shoqërohej në këtë takim nga zëvendëskryetari i LSI-së, Petrit Vasili, dhe ministrja e Integrimit, Klajda Gjosha.
