Presidenti i Republikës, Ilir Meta, ka dekretuar këtë të premte Sandër Lleshajn në postin e Ministrit të Brendshëm.
“Presidenti Meta dekreton emërimin e Sandër Lleshaj Minister i Brendshëm. Në mbështetje të nenit 93 dhe 98, pika 1 të Kushtetutës, me propozim të Kryeministrit nr. 5211 prot., datë 09.11.2018, Dekretoj: Neni 1, Zotin Sandër Lleshaj, emërohet Ministër i Brendshëm. Neni 2, Ky dekret hyn në fuqi menjëherë”, thuhet në dekretin e publikuar në faqen zyrtare të Presidencës.
Ndërsa menjëherë pas këtij lajmi ka reaguar kryeministri Rama. Me anë të një shënimi në Twitter kreu i qeverisë shkruan:
“Dekretimi i Sandër Lleshit ministër i brendshëm, një shembull kuptimplotë i faktit se edhe kur duket, sikur krisjet janë të pariparueshme a thyerjet të pashmangshme, ka gjithmonë një rrugëzgjidhje nëse ka #VullnettëMirë? Ministri i ri njeriu i duhur në vendin dhe kohën e duhur?”.
Më herët gjatë ditës së sotme, Meta dekretoi nxjerrjen në lirim të oficerit me gradë madhore, Gjeneral Brigade Sandër Lleshaj. Kjo lëvizje i ka hapur rrugën dekretimit të tij në postin e Ministrit.
Presidenti konfirmoi zyrtarisht se ishte pikërisht statusi i tij si ushtarak aktiv që e detyronte të mos e dekretonte si Ministër, për shkak të kufizimeve që Kushtetuta ka për këtë kategori.
Dekretimi i Lleshajt vjen përpara përfundimit të afatit kushtetues 7 ditor, për t’u shprehur për propozimin e dytë të Kryeministrit Edi Rama, për emërimin e Sandër Lleshajt./TIRANA TODAY/
