Kombëtarja e Argjentinës është duke kaluar një nga momentet më të këqija në histori. Ata kanë talente dhe yje në të gjitha kampionatet më të rëndësishme në botë, por kur vjen puna për të përfaqësuar kombëtaren ka një “problem” dhe ai mban emrin Lionel Messi.
Të gjithë tifozëve u bëri përshtypje zgjedhjet që bëri trajneri Joerge Sampaoli për të udhëtuar drejt Rusisë në kampionatin Botëror, ku u lanë jashtë yje për tu zëvendësuar nga futbollistë normalë. E përditshmja sportive “Clarin”, pasi publikoi problemet që kishte pasur “Pleshti” me Lo Celson dhe Fazion, gjatë pjesëmarrjes në “Rusi 2018”, ka zbuluar një tjetër prapaskenë për të përforcuar këto pretendime.
Është deklarata e Nicolas Burdisso, ish mbrojtësit të Interit dhe Romës në kampionatin italian që ka treguar se pas një përplasje me Messin emri i tij nuk u përfshi më në listën e përfaqësueses.
“Ka qenë ndeshja Argjentinë-Kolumbi, e cila përfundoi 0-0. Ai u nervozua shumë për një top që nuk ia pasova. Shkuam të sqarohemi dhe në një moment po afrohej, aq sa mendova se do të përdorte duart, por shokët nuk lanë që sherri të agravonte. Më pas sqaruam gjithçka, por që nga ai moment unë nuk u grumbullova më në kombëtare, ndonëse luaja në Serinë A, me Romën”, tregoi Burdisso.
Pas eliminimit të Argjentinës shumë shpejt nga Botërori i Rusisë dhe performacës së dobët që treguan në fushë, tifozët janë ndarë në dy anë, ku njëra kërkon që Messi të mos grumbullohet më. Të shumtë janë zërat që tregojnë se tek “albicheleste”| nuk mund të luash nëse nuk je mik me Leon dhe se është ai që e bën formacionin para ndeshjeve.
