Ditën e sotme mbi 3 milionë qytetarë shqiptarë kanë pasur të drejtën e votës.
Por, teksa shumë qytetarë kanë vërshuar drejt qendrave të votimit, ka të tjerë që kanë zgjedhur të mos e ushtrojnë të drejtën e votës.
Një gjë e tillë ka ndodhur me jo pak, por me një fshat të tërë, banorët e së cilës kanë zgjedhur të japin një mesazh të fortë në këto zgjedhje.
Bëhet fjalë për fshatin Grabovë e Sipërme në fshatin Gramsh, ku rreth 200 votues kanë bojkotuar zgjedhjet.
Kështu, edhe pse qendra e votimit është hapur që në mëngjes, askush nuk ka shkuar për të votuar në këtë fshat.
Lajmin e konfirmon edhe kryetari i KZAZ në Gramsh, i cili deklaron se qendra është hapur normalisht dhe komisionerët janë paraqitur, por asnjë qytetar nuk ka hyrë brenda për të votuar.
Mësohet se bojkoti ka ardhur si rrjedhojë e pakënaqësive të banorëve, të cilët shprehen se ka një mungesë totale të investimeve në këtë zonë.
Një nga mesazhet më të shpeshta që kemi hasur sot, është që çdonjëri prej nesh të shkojë dhe të votojë, në mënyrë që të vendosë për të ardhmen e tij.
Duket se edhe bojkotimi i zgjedhjeve është një mesazh më vete, që dëshmon më së miri humbjen e besimit të qytetarëve te politikanët.
