Gerard Deulofeu ishte në formë fantastike këtë fundjavë, ku shënoi 3 gola dhe dhuroi një asist në fitoren e thellë 5-1 të skuadrës së tij, Watford, në fushën e Cardiff. Megjithatë, edhe Messi zhvilloi një fundjavë spektakolare me 3 gola dhe një asist përballë Sevillas.
“Mendova se isha mbreti i kësaj fundjave derisa pashë Messin në ‘Sanchez Pizjuan’. Ai është një lojtar i pabesueshëm, kënaqem duke e parë atë. Një herë mbaj mend se i pasova atij një top të fortë si shalqi dhe menjëherë fillova të kërkoj falje, por ai e uli topin me një prekje të jashtëzakonshme”, tha sulmuesi spanjoll.
Deulofeu shtoi se ishte fatlum për kohën që kishte kaluar te Barcelona, por nuk e mendon një rikthim tjetër te katalansit, teksa theksoi se presioni duke e cilësuar si “Messi i ri” është shumë i fortë.
