Mesfushori i kombëtares shqiptare Ledian Memushaj po kalon një formë të shkëlqyer. Këtë e tregoi edhe në ndeshjen e fundit, kur kuqezinjtë mposhtën Izraelin.
Në ndeshjen për turin eliminator për Botërorin e ‘‘Rusi 2018’’, Memushaj shënoi edhe një nga golat e fitores së kësaj sfide.
Me paraqitjen e tij 30-vjeçari, Memushaj ka hyrë në radarin e shumë ekipeve të huaja. Pas Sionit të Tramexanit, edhe Lacio e Igli Tares ka shfaqur interes për shërbimet e mesfushorit vlonjat. Në një intervistë për “eduasportin.com”, Memushaj ka komentuar ofertat në merkato, qëndrimin te “Delfinët” dhe situatën e Kombëtares pas largimit të trajnerit De Biazi.
Intervista e plotë:
Ledian, disa ekipe kanë shfaqur interes për ju. Dy prej tyre janë Sioni dhe Lacio…
Po, e kam lexuar, por për këto gjëra interesohet menaxheri dhe ai më kontakton nëse ka ndonjë gjë konkrete. Deri tani nuk kemi marrë ofertë konkrete, domethënë janë vetëm interesime.
Pra, nuk do të vazhdoni te Peskara?
T’ju them të drejtën, akoma nuk e di…Është akoma herët për të vendosur.
Të ndalemi pak te Kombëtarja. Si e komentoni largimin e trajnerit De Biazi?
Këto janë zgjedhjet e tij personale, besoj ka pasur arsyet e veta. Duhet ta falënderojmë të gjithë për atë që ka bërë me Kombëtaren. Gjithsesi, tani duhet të shohim përpara sepse futbolli nuk ndalon. Duhet të shohim të ardhmen tonë, pasi kemi çdo gjë për të bërë mirë.
Brenda kësaj jave FSHF-ja do të zyrtarizojë emrin e trajnerit të ri. Dëshironi të jetë italian?
Nuk ka rëndësi, për mua është njësoj. Për fanellën kuqezi duhet të punojmë dhe të japim maksimumin, pavarësisht kush do të jetë trajneri dhe zgjedhjet që bën.
Shënuat ndaj Izraelit, si u ndjetë?
Emocion shumë i madh…mezi po e prisja, realisht e dëshiroja shumë dhe ia dola. Mund të them se ka qenë një nga kënaqësitë më të mëdha të karrierës sime.
Në ndeshjen me Izraelin patët një “incident” me Sadikun. Çfarë ndodhi dhe si i keni marrëdhëniet tani?
Nuk ndodhi asgjë… ishte diçka normale. Kishte një rast të mirë për t’i dhënë topin dhe mbrojtësi i tyre e kuptoi. Ai më pas u mërzit, por kjo është më se normale në lojë.
Ndeshja Maqedoni–Shqipëri është zhvendosur nga stadiumi i Shkupit tek ai i Shtrumicës. Duke ditur “konfliktet” shqiptaro-maqedonase, a keni frikë se mund të përsëritet e njëjta situatë si në Beograd?
Po, kemi shumë shanse për ta fituar ndeshjen, por duhet të qëndrojmë me këmbë në tokë si para ndeshjes me Izraelin dhe të mos bëjmë gabimin që të tregohemi mendjemëdhenj. Për sa i përket sigurisë në stadium, nuk besoj të ndodhin të njëjtat incidente që ndodhën me Serbinë.
