Kombëtarja zvicerane e futbollit pas deklaratave që bënë një ditë më parë në konferencën për shtyp Shaqiri, Xhaka dhe Stephan Lichtsteiner, ku kërkuan falje për festimin me “shqiponjë” në Botërorin e Rusisë, duket se ka gjetur qetësinë. Ishte një lëvizje e mirë, që ekipi të “kyçet” në Ligën e Kombeve dhe të demonstrojë frymën e grupit.
Lichtsteiner dhe Xhaka patën sukses në atë çfarë thanë para mediave për të justifikuar atë veprim dhe për ti bindur që nuk do të përsëritet, por për Shaqirin nuk pati rezultatin e duhur. Shaqiri bën gabime njëri pas tjetrit. Ishte krejtësisht e panevojshme që mes fjalëve që ai kërkoi falje të përdorte terma si “Njerëz që ndjekin futboll në male”.
Ai i hodhi sërish benzinë zjarrit me budallallëqet që foli. Po, zoti Shaqiri, ne jemi një vend malor. Por jo, zoti Shaqiri, jo të gjithë ata që jetojnë në male, janë nacionalistë të vegjël si ju, të pashpresë, të vjetërsuar dhe të verbuar!, shkruan Blick.
Por, me shpjegimet e djeshme, të paktën është krijuar baza për të shikuar përpara dhe për t’i dhënë fund kësaj teme të lodhshme. Traineri Vladimir Petkoviç mbetet sërish shumë kokëfortë.
Ai pohon se Granit Xhaka do ta udhëheqë kombëtaren zvicerane si kapiten në mungesë të Stephan Lichtsteiner. Gjithashtu ai nuk pranon që në skuadrën e drejtuar prej tij të ketë një krizë të identitetit. Por të injorosh Yann Sommer për shërbimet e tij dhe të gradosh Xhakën në këtë hierarki do të thotë se përfaqëson diçka, që është e pakuptueshme.
