Në lidhje me drogën e sekuestruar një ditë më parë në Brazil me logon ‘KF Elbasani’, presidenti i klubit të futbollit të Elbasanit, Arben Laze, ka mohuar të ketë lidhje me të, ndërsa e ka cilësuar si prishje me dashje të imazhit. Në një intervistë ekskluzive për Report Tv, Laze shprehet se sasia prej 617 kg kokainë, nuk ka lidhje aspak me të dhe as me të shkuarën e tij. Ai madje shton më tej se do të kontaktojë me avokatin për të ngritur padi, për prishje të imazhit. Arben Laze shprehet me ironi se është i lumtur që klubi ka emër edhe në Brazil.
“E ndoqa me vëmendje të gjithë ngjarjen, dhe më ka ardhur shumë keq që stema e klubit të jetë aty ku nuk e meritonte, më vjen keq të keqpërdoret imazhi i klubit që unë e kam krijuar vetë, dhe kam krijuar dhe e kam fantazuar që nga momenti që unë kam ardhur këtu.
Klubi nuk ka lidhje me asnjë lloj lidhje, kushdo mund ta keqpërdorë atë stemë, kanë keqpërdorur figurën e CR7, Messit. Do pyes avokatin për të ngritur padi për prishje të imazhit. S’e besoj që ka lidhje me problemet e mia. Më vjen mirë që klubi paska emër edhe në Brazil”, tha ai.
Dje u sekuestrua në Brazil një sasi rekord kokaine, 617 kg e pastër, ndërsa destinacion dyshohet se ishte Shqipëria, pasi në pakot e drogës që ishin futur në një kabinë të dyfishtë të një kamioni, ishte shkruar “K.F. Elbasani”, stema e ekipit të futbollit të këtij qyteti.
