Taulant Muka dha dorëheqjen nga posti i zv/ministrit të Arsimit, pasi e ka konsideruar të papranueshëm modelin e punës në Ministrinë që drejtohet nga Lindita Nikolla. Ai ka këmbëngulur se këtë post nuk e mori për pushtet, por për të reformuar sistemin arsimor në Shqipëri, që sipas tij, është në gjendjen më të keqe në histori.
Në një intervistë për “Kafein”, Muka ka rrëfyer edhe një histori të tij. Kur ishte pjesë e protestave nga lëvizja studentore në Shqipëri, disa vite më parë, dikush i kishte ofruar një çek të bardhë për ta plotësuar, me qëllim që “të mbyllte gojën”. Taulant Muka tha se në atë periudhë kur studionte për mjekësi, prindërit e tij kishin borxhe, por ai nuk e pranoi kurrsesi atë çek. Muka i mëshoi fort faktit se nuk e donte atë post për lekë, por si një mundësi për arsimin e lartë, që mendon se është plaga më e madhe e shoqërisë shqiptare.
“Po them një informacion që nuk e kam ndarë me askënd. Kur kam qenë në vit të katërt apo të pestë në mjekësi, kur studioja në Shqipëri, isha pjesë e protestave të lëvizjes studentore për reformën në sistemin arsimor. Dhe u bë edhe si luftë kundër dekanit në atë kohë. Mua më erdhi një çek i bardh në atë kohë për tu plotësuar nga një person i caktuar. Më tha plotëso dhe mbylle gojën, ndërkohë në atë kohë prindërit e mi kishin borxhe, dhe unë e grisa çekun e bardhë. Dua të them me këtë se nuk kam ardhur për të marrë lek dhe nuk e shikoja këtë pozicion për pushtet, por si mundësi për arsimin e lartë, që mendoj se është drama dhe plaga më e madhe e shoqërisë shqiptare”, u shpreh Muka.
