Pas dekretimit të Sandër Lleshajt si Ministër i Brendshëm ka reaguar edhe kreu i PD, Lulzim Basha.
“Me a pa Llesh MB ka shkuar për dreq sa kohë kryeministër është ai që mbron me thonj kriminelët dhe politikanët e lidhur me krimin, nga Dako te Balla, nga Tahiri e Xhafaj te Gjiknuri, Rrahja, Çyrbja e Sejdini me shokë. Peshku është qelbur nga koka. Nga koka duhet pastruar!”, deklaron Basha.
Ndërsa pak më parë i menjëhershëm ka qenë reagimi i Kryeministrit Edi Rama, pas dekretimit të Sandër Lleshajt si Ministër i Brendshëm.
“Dekretimi i Sandër Lleshit ministër i brendshëm, një shembull kuptimplotë i faktit se edhe kur duket sikur krisjet janë të pariparueshme a thyerjet të pashmangshme, ka gjithmonë një rrugëzgjidhje nëse ka #VullnettëMirë. Ministri i ri njeriu i duhur në vendin dhe kohën e duhur”, shkruan kryeministri në një postim në Twitter.
Dekretimi nga Presidenti Meta erdhi pak përpara përfundimit të afatit kushtetues 7 ditor, për t’u shprehur për propozimin e dytë të Kryeministrit Edi Rama, për emërimin e Sandër Lleshajt në krye të Ministrisë së Brendshme.
Presidenti e parapriu këtë vendim më herët gjatë kësaj të premteje, duke pranuar kërkesën e Sandër Lleshajt për ta nxjerrë në lirim si Gjeneral Brigade. Presidenti konfirmoi zyrtarisht se ishte pikërisht statusi i tij si ushtarak aktiv që e detyronte të mos e dekretonte si Ministër, për shkak të kufizimeve që Kushtetuta ka për këtë kategori./TIRANA TODAY/
