Miratohet kërkesa drejtuar Kuvendit për shkarkimin e Presidentit Meta. Me 14 vota pro, një kundër dhe asnjë abstenim, mazhoranca ka miratuar në Komisionin e Ligjeve raportin për ngritjen e një Komisioni Hetimor me qëllim shkarkimin e presidentit Ilir Meta. Ishte kreu i Komisionit të Ligjeve, Ulsi Manja, që deklaroi në përfundim të mbledhjes se, Komisioni vendosi t’i propozojë Kuvendit të Shqipërisë ngritjen e një Komisioni Hetimor Parlamentar për të hetuar shkeljet e kushtetutës nga ana e presidentit të Republikës. “E bashkoj votën time dhe ju ftoj që këtë raport të Komisionit të Ligjeve. Që t‘i propozojmë Kuvendit miratimin e këtij raporti duke propozuar ngritjen e një Komisioni Hetimor Parlamentar për të hetuar të gjitha këto shkelje të natyrës kushtetuese. Nëse ky komision hetimor do të konstatojë nëse në të gjithë veprimtarinë e presidentit ka shkelje të rëndë të Kushtetutës t‘i propozojë Kuvendit shkarkimin e Presidentit të Republikës”, tha Manja.
I vetmi anëtar i Komisionit të Ligjeve që votoi kundër ngritjes së Komisionit Hetimor për presidentin ishte Adriatik Alimadhi. Komisioni kishte ftuar për të dëgjuar presidentin Ilir Meta, por ky i fundit kërkoi që të shprehej në datën 10 maj, për shkak të kohës së pamjaftueshme për mbrojtjen dhe për shkak se nuk mund të anulonte axhendën e takimeve të datës 6 maj.
Ishin 49 deputetë të Kuvendit të Shqipërisë që përpiluan një raport ku kërkuan nisjen e procedurës për shkarkimin e Presidentit të Republikës, menjëherë pas thirrjes publike të kreut te Grupit Parlamentar të PS-së, Taulant Balla. 9 maji është data e fundit kur Kuvendi mund të ngrejë Komisione Hetimore, pasi ligji përcakton që nuk mund të ngrihen komisione 4 muaj para mbarimit të afatit të Parlamentit. Kjo ka bërë që Balla e Ruçi të kërkojnë mbajtjen e një seance të Kuvendit nesër, më 7 Maj, ku edhe pritet të votohet lidhur me ngritjen e Komisionit Hetimor për kreun e shtetit.
