Prindërit e nxënësve të shkollës 9-vjeçare “Rilindja”, kanë folur pas skandalit të publikuar lidhur me përdhunimin e 13-vjeçares nga të paktën 8 persona, të verifikuar nga autoritetet.
Teksa mësimi ka nisur normalisht, por me masa të shtuara, prindërit kanë shoqëruar fëmijët e tyre në ambientet e shkollës. Ata shprehen se janë të shokuar nga rasti, të cilin e kishin mësuar nga mediat, ndërsa flasin fjalët më të mira për familjen e vajzës minorene.
“Jemi të shokuar nga ngjarja. Fëmijët nuk na kanë treguar çfarë ka ndodhur. Rastin e mësuam kur u bë publik. Nuk duhet të hidhet baltë mbi shkollën. Nuk ka faj shkolla. Ngjarja ka ndodhur jashtë”, kanë thënë ata.
Ndërkohë fëmijët kanë treguar tek prindërit se vajza e abuzuar nuk ka shfaqur asnjë shenjë të çuditshme. Madje, sipas banorëve, ajo ishte nxënëse e shkëlqyer.
Banesa e vajzës është shumë pranë shkollës. 13-vjeçarja jeton me gjyshërit, 2 motrat dhe të ëmën, ndërsa i ati kishte punuar shofer në bashki, por prej disa vitesh kishte emigruar në Itali. Pasi mori vesh ngjarjen, ai është kthyer pranë familjes.
