Lushnja ka bërë befasinë e javës së 14 në Superiore, duke mposhtur kampionët në fuqi në “Zeqir Ymeri”, me rezultatin e thellë 1-3. Kuksianët e Milinkovic zbresin në fushë të tensionuar dhe aspak të qetë për një ndeshje futbolli dhe kjo bën që të gabojnë shumë para portë. Por ndryshe veprojnë miqtë, që aktualisht mbajnë vendin e fundit dhe rastet e pakta që u jepen i shfrytëzojnë mjaft mirë. Lushnjarët kalojnë ta parët në avantazh me kuksianin Preci dhe pavarësisht barazimit të përkohshëm të Bakajt, Sefa rikthen epërsinë me dy gola.
Lagunorët kalojnë shumë shpejt në avantazh me anë të Precit që në minutën e 12, pas një devijimi mjaft të mirë nga brenda zone. Reagimi i verilindorëve është i shpejtë pasi pushtojnë gjysmëfushën e kundërshtarëve, por nuk janë të saktë para portës me Bakajn dhe Shametin, pavarësisht asiste të mira që nxjerr Guri. Pjesa e parëmbyllet në fitore të lushnjarëve, me gol të shënuar nga një kuksian në “Zeqir Ymeri”. Në të dytën Bakaj nuk fal por vetëm tre minuta pas startit barazon shifrat. Kthehet një rreze shprese për vendasit që vazhdojnë të mbajnë ritmin e lartë, por Guri edhe pse depërton mjaft mirë në zonë, goditja është për tu harruar. Sefa në të 66’-ën përfiton mjaft mirë nga një gabim në mbrojtjen e Kukësit dhe me një goditje të shtruar mposht portierin Koliqi dhe rikthen avantazhin.
Edhe pas avantazhit Lushnja rri e tërhequr mbrapa dhe pret të përfitojë nga ndonjë kundërsulm. Në minutën e 83-të, Shameti dhe Hoxha nuk kuptohen me njëri-tjetrin në prapavijë, duke i dhënë “asistin” e duhur Sefës, që trefishon shifrat. Goditje fatale për verilindorët, ndërsa lushnjarët bëjnë befasinë e madhe të kësaj jave të Superiores, duke fituar 3-1. Ky rezultat ka shtuar tensionet brenda klubit dhe Milinkovic tashmë e ka më të ngushtë “lakun”, qëndrimi i tij në ekip është një dilemë e madhe.
KUKESI – LUSHNJA 1-3
Golat: Bakaj 48’ / Prenci 12’, Sefa 66’, 83′
Kukësi: Koliçi, Idrizi, Shameti, Hoxha, Rrumbullaku (Peposhi 67’), Ethemi (Shtubina 74’), Imami (Alla 55’), Musolli, Bakaj, Guri, Alijev. Trajner: Mlladen Milinkoviç
Lushnja: Spaho, Meto, Prençi, Marku, Mone (Ruco 73’), Pepa, Gava, Papa, Alushi (Magani 73’), Canka (Bufasi 86′), Sefa. Trajner: Hysen Dedja
Gjyqtarë: Klodian Shahini, Egin Doda, Fatmir Lamaj
Kartonë të verdhë: Bakaj 77’ / Papa 74’
