Kampionati anglez është mbyllur në mënyrë spektakolare, duke dhuruar emocion deri në momentin e fundit, ku Manchester City dhe Salah vendosin rekorde. Liverpool ka marrë një fitore mjaft të rëndësishme në javën e fundit duke siguruar një vend në Champions League për sezonin e ardhshëm, pavarësisht se si do të shkojë finalja përballë Real Madridit.
Salah gjeti sërish rrugën e rrjetës në një fitore të thellë 4 me 0 që “The Reds” morën përballë Bringhton, goli i 32-të për të në Premier League. Egjiptiani është shpallur golashënuesi më i mirë, por jo vetëm kaq, ai ka vënë një rekord historik si futbollisti që ka shënuar më shumë gola në harkun e një kampionati, që kur në Premier League marrin pjesë 20 ekipe. Lovren, Solanke dhe Robertson shënuan golat e tjerë për ekipin e Klopp.
Ndërkohë, Chelsea mbetet në vendin e pestë pas humbje së turpshme 3-0 në “St.James Park” kundër Newcastle. Londinezët mund ta zbusin dhimbjen vetëm nëse fitojnë në finalen e Kupës së Ligës kundër Manchester United dhe Liverpool mposht Real në finalen e Champions.
United fitoi 1-0 në javën e fundit të Premier League, me golin e shënuar nga Marcus Rashford kundër Watford.
Manchester City, kampion i Anglisë, fitoi 1-0 ndaj Saouthampton me golin e shënuar nga Gabriel Jesus në minutën e fundit dhe e mbylli sezonin me 100 pikë, një rekord i paimagjinueshëm për ekipin e Pep Guardiola.
Vlen për t’u përmendur edhe fitorja e Tottenham, 5-4 ndaj Leicester. Ky festival golash në “Wembley” i jep mundësinë skuadrës së Pochettino ta mbyllë kampionatin në vendin e tretë, teksa me dy golat e shënuar Harry Kane u ngjit në 30 gola, dy më pak se Salah. Ndërsa Swansea, Stoke City dhe WBA kanë rënë një kategori më poshtë pasi janë renditur në tre vendet e fundit.
