Aksioni kundër informalitet ka prodhuar një numër shumë të lartë barrash hipotekore të vendosura nga administrata tatimore ndaj bizneseve debitore. Sipas përmbaruesve gjyqësore privatë, bëhet fjalë për një numër shumë të madh biznesesh, të cilët sot nuk mund të bëjnë asnjë transaksion me pasuritë e tyre të paluajtshme, pa shlyer më parë detyrimet.
“Këto janë masa paraprake që merr administrata tatimore bazuar në ligjin 98/20, i cili i njeh asaj të drejtën për mbledhjen e detyrimeve me forcë. Kjo është një masa paraprake shtrënguese, e cila vendos barrë mbi pasuritë që bizneset debitore ndaj administratës tatimore. Është një procedurë e ligjshme, por është procedura pa kaluar ende në konfiskimin përfundimtar të të gjithë aseteve që kanë kompanitë debitore karshi administratës tatimore doganore”, u shpreh Altin Latifi nga Dhoma e përmbaruesve gjyqësorë, shkruan Scan.
Vendosja e barrës hipotekore është vetëm një prej masave shtrënguese që përdorin tatimet e doganat për të vjelur detyrimet e papaguara. Ajo i paraprin sekuestrimit të këtyre pasurive në rast se bizneset nuk shlyejnë detyrimet, proces që shumë shpejt mund të arrijë edhe në konfiskimin e shitjen e tyre në ankand.
“Lidhet direkt me disponimin e pronësisë, apo me të ardhurat e disponimit që i njeh ligji që ky biznes është si një pronë pa e gëzuar. Pra, mund ta ketë pronën në posedim momentalisht, por ajo në çdo moment është e rrezikuar që t’i merret, t’i konfiskohet, t’i shitet në ankand publik për shlyerjen e këtyre detyrimeve. Në asnjë moment biznesi nuk mund të shesë këto prona, nuk mund të kërkojë nga një bankë marrjen e kredive, likuiditet për të vijuar punën e tij, por duke lënë kolateral këto prona, sepse këto detyrime ndaj shtetit prevalojnë ndaj shumë detyrimeve të tjera edhe kjo i krijon herë pas here bizneset atë bllokimin e të gjithë aktivitetit të tij jo vetëm financiar të cilin mund ta ketë të bllokuar vetë për arsye të ndryshme, por edhe bllokimin e pjesës së shitjes së pasurive që ai ka” , tha Latifi.
Sipas të dhënave zyrtare, deri në fund të vitit 2016 ka shkuar në mbi 50 mijë numri i barrave hipotekore të aplikuara nga administrata tatimore ndaj bizneseve debitore.
