Kylian Mbappe është një nga talentet më premtues, që pritet të fitojë edhe “Topin e Artë” në të ardhmen. Në një moshë shumë të re ai është lojtari i dytë sa i përket çmimit në merkato, plot 180 milionë euro, duke e kaluar vetëm shoku i ekipit tek PSG, Neymar. Në një intervistë për spanjollen “Marca”, Mbappe ka treguar disa nga yjet e tij të fëmijërisë si Ronaldo, Zidane dhe situatën e Benzema. Po ashtu nuk kanë munguar elozhet për shokun e ekipit, brazilianin Neymar.
Cristiano Ronaldon?
“Ai është heroi i fëmijërisë sime. Takimi me të ka qenë i mahnitshëm, kur e vizitova Valdebebas. Por, tani jam garues dhe e gjitha çka dua është të fitoj, fitoj dhe fitoj. E admiroja atë kur isha i ri, por kjo gjë ka përfunduar tani”.
Neymar?
“Neymar është këtu dhe mendoj se është shumë i ngjashëm dhe praktikisht në një nivel me Cristiano Ronaldon. Njerëzit nga jashtë e njohin një Neymar në fushë, që s’është ai Neymari [i vërtetë]. Njerëzit e shohim duke bërë trika dhe driblime dhe mendojnë se ai tenton ta kënaqë vetën dhe se është vetjak dhe mendon vetëm për veten. Ama, kur ta ndani të njëjtën zhveshtore me të e kuptoni se nuk është ashtu, nuk është ai Neymari. Ai është person shumë i dashur dhe interesohet për të gjithë. Është shumë i mirë dhe luan për skuadrën.”
Zinedine Zidane?
“Zidanin e kisha idhull. Të gjithë në Francë e donin Zidanin. Të gjithë ata që e pëlqejnë futbollin e dinë se ai është rast i veçantë. Ajo çfarë po bën me Real Madridin që prej se u bë trajner është e jashtëzakonshme”.
Karim Benzema?
“E shoh atë si lojtar të madh. Nuk e di saktësisht çka ka ndodhur [që ai është lënë jashtë Kombëtares së Francës] dhe nuk mund të them shumë për këtë. Por, ajo që e di sigurt është se ai është lojtar i madh”.
