Një bankë e nivelit të dytë në Koplik u grabit dje nga tre persona të maskuar dhe me armë. Kanë mjaftuar vetëm shtatë minuta, që autorët e grabitjes të kryejnë veprimin e tyre. Autorët kanë hyrë të maskuar në bankë, kanë marrë paratë dhe janë larguar. Tashmë është bërë me dije edhe shuma e parave që janë grabitur nga sportelet e bankës. 10.000 euro, 1000 dollarë dhe rreth 400.000 lekë (të reja) kanë grabitur dje autorët e armatosur në bankë.
Në ambientet e bankës, veç punonjësve ka pasur dhe klientë, që janë terrorizuar. Nën kërcënimin e armëve morën paratë dhe u larguan me një mjet “Volkswagen” ngjyrë të errët.
Pak minuta më pas në dalje të qytetit, rrugës për në Bajzës i vunë zjarrin makinës në mes të rrugës. Më pas ndaluan një Benz në të cilin ndodheshin tre persona. I kërcënuan me armë dhe i zbritën nga mjeti. Grabitësit morën Benzin dhe mësohet se u larguan në drejtim të Hanit të Hotit.
Policia thekson se po punohet për zbardhjen e ngjarjes, dhe sqarimin e plotë të rrethanave të saj.
“Shërbimet e policisë janë vënë në ndjekje të autorëve. Në ndihmë të policisë lokale janë nisur shërbimet e Drejtorisë Vendore të Policisë Shkodër dhe grupe të FNSH Shkodër.
Gjithashtu janë ngritur pika kontrolli, me qëllim identifikimin dhe kapjen e autorëve. Grupi hetimor, nën drejtimin e Prokurorisë pranë Gjykatës së Rrethit Gjyqësor Shkodër, po punon për zbardhjen e ngjarjes dhe sqarimin e plotë të rrethanave të saj”, njofton policia.
