Një në pranga dhe një tjetër i shpallur në kërkim është rezultati i një operacioni të policisë në Kurbin, e cila mundi të parandalonte një konflikt që mund të kishte pasur pasoja të rënda. I arrestuarit është Rudolf Lama, 22 vjeç, ndërsa në kërkim u shpall 48-vjeçari S.T.
Ky i fundit, sipas një njoftimi të policisë, mesditën e së shtunës është konfliktuar për motive të dobëta me vëllain e Rudolf Lamës, D.Lama tek Ish – Uzina në Laç dhe e ka goditur me levë hekuri, duke i shkaktuar lëndime trupore. Lama u dërgua në Spitalin e Traumës në Tiranë dhe ndodhet nën kujdesin e mjekëve.
Në momentin që 22-vjeçari Lama ka marrë vesh për konfliktin, ka marrë një pushkë model 63 me fishekë dhe në gjaknxehtësi ka shkuar tek fabrika e 48-vjeçarit S.T., ku e ka ofenduar dhe kërcënuar, si dhe ka qëlluar disa herë me armën e zjarrit.
Njoftimi i plotë
Kurbin, ndërhyrja në kohë rekord e policisë parandalon përshkallëzimin e një konflikti i cili agravoi në përdorimin e armëve të zjarrit.
Arrestohet në flagrancë autori i dyshuar i përdorimit të armës së zjarrit si dhe sekuestrohet arma e zjarrit pushkë, shpallet në kërkim autori tjetër i dyshuar i konfliktit.
Me datë 09.06.2018, nga specialistët e Seksionit kundër krimeve në Komisariatin e Policisë Kurbin, u bë arrestimi në flagrancë i shtetasit : – Rudolf Lama, 22 vjeç, banues në Kurbin për veprat penale ” Prodhim dhe mbajtje pa leje e armëve luftarake dhe municionit” ” Kanosja” dhe ” Prishje e rendit dhe qetësisë publike” parashikuar nga nenet 278/1, 84 dhe 274 të Kodit Penal.
Gjithashtu, u shpall në kërkim dhe punohet për kapjen e shtetasit S.T. 48 vjeç, banues në Kurbin për veprën penale ” Plagosje e lehtë me dashje” parashikuar nga neni 89 i Kodit Penal.
Në mesditën e datës 09.06.2018, shtetasi S.T., tek Ish – Uzina në Laç, është konfliktuar për motive të dobëta me shtetasin D.Lama ( vëllai i shtetasit Rudolf), ku e ka goditur me mjet të fortë ( levë hekuri) duke i shkaktuar lëndime trupore, i cili është dërguar në Spitalin e Traumes në Tiranë nën kujdesin e mjekëve.
Në momentin që shtetasi Rudolf Lama ka marrë vesh për konfliktin, ka marrë një armë zjarri pushkë model 63, me fishekë, dhe në gjaknxehtësi, ka shkuar tek fabrika e shtetasit S.T. ku e ka ofenduar dhe kërcënuar si dhe ka qëlluar disa herë me armën e zjarrit.
Falë vlerësimit në kohë të situatës dhe njoftimit për konfliktin, nga forcat policore të Komisariatit të Policisë Kurbin, është bërë e mundur ndërhyrja në kohë rekord duke arrestuar në flagrancë shtetasin Rudolf Lama dhe sekuestruar edhe armën e zjarrit pushkë me të cilën kishte kërcënuar dhe qëlluar.
Materialet proçeduriale iu referuan Prokurorisë së Rrethit Gjyqësor Kurbin, për veprime të mëtejshme.
