Policia e Maqedonisë ka bërë të ditur se po vazhdojnë përpjekjet e emigrantëve nga viset e prekura nga lufta në Lindjen e Mesme, që të kalojnë nëpër territorin e këtij shteti për të vazhduar drejt vendeve të Bashkimit Evropian.
Ministria e Punëve të Brendshme e Maqedonisë ka konfirmuar se gjatë dy muajve të fundit janë regjistruar 393 raste të emigrantëve, të cilët ilegalisht kanë tentuar të hyjnë në territorin e Maqedonisë. Gjatë muajit qershor ishin 109 raste, ndërsa gjatë muajit maj, 284 raste.
Sipas statistikave të kësaj Ministrie, 224 emigrantë janë kapur përgjatë vijës kufitare Maqedoni – Greqi, dhe janë kthyer sërish në territorin e Greqisë.
Policia maqedonase gjatë javës së kaluar ka zbuluar dhe trafikimin e tetë emigrantëve nga India dhe Pakistani të cilët ilegalisht kanë tentuar ta kalojnë territorin e Maqedonisë.
Në bazë të ndryshimeve që pësoi vitin e kaluar Ligji për azilin, pas mbylljes së Rrugës Ballkanike, emigrantët të cilët ilegalisht hyjnë në Maqedoni nga një shtet i cili është pjesë e BE-së apo NATO-s, duhet që të kthehen sërish në të njëjtin shtet me shoqërim të Policisë.
Përderisa në raportin e fundit të Komitetit të Helsinkit për të Drejtat e Njeriut në Shkup, theksohet se emigrantët që vijnë në Maqedoni përmes rrugëve ilegale nga viset e prekura nga lufta në Lindjen e Mesme dhe Afrikën e Veriut, në mënyrë jolegale depërtohen nga Maqedonia si shtet.
Uranija Piroska nga Komiteti i Helsinkit në Shkup tha se rënia e interesimit edhe nga mediet për problemet me emigrantët në Maqedoni, u hap rrugë për të vepruar trafikantëve.
“Defokusimi i medieve nga problemi me emigrantët të cilët ilegalisht hyjnë në Maqedoni, ka bërë që emigrantët të bëhen pre e trafikuesve, të cilët për shuma të caktuara i bartin emigrantët nga kufiri jugor i shtetit drejt atij verior”, thotë Piroska.
Ndërkaq, Jasmin Rexhepi nga Organizata joqeveritare, LEGIS thotë se ekipet e organizatës që përfaqëson, për çdo ditë regjistrojnë emigrantë të cilët, për çdo ditë tentojnë që t’i kalojnë vendkalimet kufitare, të nxitur nga dëshira për të vazhduar udhëtimin e tyre drejtë vendeve të familjes evropiane, raporton REL.
“Ne kishim një rast në qershor, kur një grup i emigrantëve u paraqit në kampin e Tabanovcit dhe Ministria e Punëve të Brendshme u lejoi atyre që të futen brenda pas reagimit tonë përmes Avokatit të Popullit”. Emigrantët me ditë të tëra të qëndrojnë në male për të gjetur një mundësi që përmes rrugëve sporadike, në momente të caktuara të vazhdojnë udhëtimin drejt destinacionit të caktuar. Kjo i bën ata edhe më shumë që të bëhen pre e keqtrajtimeve nga ana trafikuesve”, thotë Rexhepi.
Sipas të dhënave të Policisë së Maqedonisë, aktualisht në qendrën transitore në Vinojug përgjatë vijës kufitare Maqedoni –Greqi, qëndrojnë 9 emigrantë, ndërkohë që në atë të Tabanovës, përgjatë vijës kufitare Maqedoni – Serbi, qëndrojnë 20 emigrantë.
