Tre ish-ministra dhe një ish-zëvendës ministër janë ndaluar sot nga policia maqedonase, pasi akuzohen për shpërdorim detyre.
Një nga të ndaluarit, Lupço Dimovski është aktualisht deputet në parlament dhe po ashtu i amnistuar në lidhje me ngjarjet e dhunshme të prillit të 2017-s në parlament.
Po ashtu, policia ka shoqëruar ish-Ministrin Aco Spasenovski dhe Mihail Cvetkov dhe ish-zv.Ministrin Kristijan Delev. Tre të parët ishin, apo vazhdojnë të jenë përfaqësues të Partisë Socialiste, aktualisht në opozitë, ndërsa Delev është kuadër i VMRO-DPMNE-së.
Vepra e tyre penale ka të bëjë me shpërdorimin e ndihmave bujqësore dhe dhënien me qira të tokave bujqësore në pronë të shtetit gjatë periudhës prej vitit 2009, deri më 2016, raporton VOA.
Ministri i Rendit i Maqedonisë Oliver Spasovski, u tha mjeteve të informimit se dëmi që kishin shkaktuar të akuzuarit arrinte një vlerë prej 1,4 milionë eurosh.
