Kreu i Komisionit të Ligjeve, deputeti socialist Ulsi Manja tha sot se ka qenë dikur eprori i Arta Markut por nuk i ka kërkuar ai të kandidonte për kryeprokuror. I ftuar në emisionin “Kjo javë” në “News24”, Manja ka mohuar atë që është përfolur në media se ka qene ai dhe deputetja Vasilika Hysi që e ka propozuar në Partinë Socialiste(lexoje lajmin e plotë këtu) .
Manja deklaroi se ai ka qenë për ca kohë eprori i Arta Markut në kohën kur ai ka punuar në Prokurorinë e Shkodrës. Manja sqaron se Arta Marku ka qenë një ndër 19 kandidatët që kanë kandiduar me iniciativën personale për t’u bërë pjesë e Këshillit të Lartë të Prokurorisë. Ai thotë se nuk është një kandidature që erdhi dhe u bë pjesë e garës me ndikim. Manja shpjegon se Marku u zgjodh aty si profesioniste për të ushtruar funksionet dhe detyrat.
“Njohja jonë daton në vitet 2002-2007 kur unë punoja në Prokurorinë e Shkodrës. Kam punuar në Shkodër me Zonjën Marku, kam qenë për disa kohë eprori i saj. Dihet problematika e Shkodrës. Është një nga qytetet e mbarsur me situata kriminale. Dhe unë mendoj se çdo prokuror që ka ushtruar detyrën atyre është i denjë për t’u ulur në karrigen e kryeprokurorit.
Ato që thuhen janë akuza që bëhen nga segmente të caktuara të opozitës. Me ikjen e Llallës, tek opozita duket se janë thyer ca ekuilibra. Duhet të jetë hall shumë i madh ai që i ka detyruar të reagojnë ashtu në Kuvend.
Zonja Marku, po t’i referoheni kandidaturave për t’u bërë pjesë e Këshillit të Lartë të Prokurorisë rezulton se ka qenë një ndër 19 kandidatët që kanë kandiduar me iniciativën personale. Pra nuk është një kandidature që erdhi dhe u bë pjesë e garës bashkë me kandidatët e tjerë që duhen falënderuar që u bënë pjesë e garës, me ndikim. Arta Marku u zgjodh aty si profesioniste për të ushtruar funksionet dhe detyrat.
Në mënyrë të vazhdueshme kryeministri Rama i ka bërë thirrje të vazhdueshme kreut të opozitës për të gjetur një zgjidhje, jo për të bërë Pazar, apo marrëveshje politike për të zgjedhur një Kryeprokurori. Thirrja ishte e thjeshtë, për dakordësi për procesin që do ndiqej. Ne kemi ndjekur të njëjtën procedurë si për Avokatin e Popullit, për Komisionerit kundër diskriminimit, pra me shprehje interesi publik, dhe më pas janë bërë dëgjesa për kandidaturat”, u shpreh deputeti Manja.
Komunikimi im me Arta Markun, të cilës gjej rastin t’i uroj detyrën e re, ka qenë atë ditë që ka ardhur për seancë dëgjimore, dhe ditën kur është zgjedhur. Pra kam komunikuar në ditën e dëgjesave me të, ashtu si edhe me 6 kandidatët e tjerë. Unë nuk jam për të bërë bilancin e punës së Arta Markut. Dosjet janë aty, çështjet që ka hetuar po ashtu. Ne si Komision na mjafton vlerësimi i punës që është bërë për secili nga kandidatët që iu bashkuan garës. Arta Marku kishte vlerësim maksimal nga eprorët e saj”, deklaroi Manja.
