Italia me Mancinin në stol duket qartë që ka një optimizëm tjetër, por edhe rikthimi i Balotellit e bën atë më të fortë. Pas testit me Arabinë Saudite tashmë “axurrët” do të përballen me një kundërshtarë më të fortë të premten në mbrëmje, Francën pretendente për të fituar Kupën e Botës. Mancini mes emrave që zbuloi si titullarë, ka zbuluar edhe mënyrën se si vendoset kush do të mbajë shiritin e kapitenit dhe duket një skemë e njohur. Atë do ta mbajë lojtari me më shumë prezenca në ekip, skemë që e ka përdorur edhe Panucci në kombëtaren shqiptare.
“Pas testit ndaj Arabisë Saudite, dua të shoh se si do të sillet skuadra përballë një kundërshtari të fortë, kandidat për të fituar kampionatin Botëror. Shpresoj të bëjmë një figurë të mirë, por jam i vetëdijshëm që Franca është shumë më përpara me përgatitjet, pasi ka rritur intensitetin në prag të kampionatit”, deklaroi Mancio.
Më pas tekniku i Italisë zbuloi disa emra edhe për formacionin, ndërsa pranoi se Balotelli është ende në dyshim, pavarësisht paraqitjes mjaft të mirë kundër sauditëve.
“Në portë do të luajë Sirigu dhe me shumë gjasë nga fillimi do të zbresë edhe Insigne. Për Balotellin kam ende dyshime, ndonëse e di që në Nice ka shumë adhurues. A mund të mbajë shiritin e kapitenit? Rregulli është që shiritin e mban lojtari me më shumë ndeshje dhe nëse ai është Mario, atëherë padiskutim që do të zbresë si kapiten”, tha Mancini.
