Manchester United nën drejtimin e Ole Gunner Solskajer është duke kaluar një formë të jashtëzakonshme. Legjenda e United e gjeti skuadrën në një gjendje të rëndë psikologjike, pasi nën drejtimin e Jose Mourinhos i gjithë grupi kishte humbur motivimin.
Duket sikur Solskajer ka gjetur formulën ‘magjike’ dhe lojtarët që ishin kthyer në dështim tani duken të rilindur. Paul Pogba ishte një ndër futbollistët që kishte humbur klasin dhe shkëlqimin, por në 6 ndeshjet e fundit ai ka qenë vendimtar. Edhe Davide De Gea prej kohësh nuk gëzonte këtë formë, që arriti kulmin përballë Tottenham ku ishte një mur i pakalueshëm për sulmin e rrezikshëm të Spursave, duke bërë 11 pritje ‘anormale’.
Ole ka zhvilluar gjashtë ndeshje në pankinën e “Djajve” dhe në të gjitha ka arritur të fitojë, një statistikë që e bën atë një ndër trajnerët e parë që fiton 6 takimet e para te United. Por si arriti Solskajer të rikthejë Manchesterin në këtë formë të jashtëzakonshme?
Mediat britanike aludojnë se arkitekti i vërtetë i kësaj rilindje është legjenda Sir Alex Ferguson. Dyshimet kanë lindur për një sërë arsyesh. Ferguson nuk ishte parë në tribunën e United prej disa kohësh, ndërsa tani është i pranishëm në çdo ndeshje, edhe në transferta. Që pasi dha dorëheqjen nga trajner, nuk kishte marrë pjesë në asnjë stërvitje të United, ndërsa me ardhjen e Ole ai ka vizituar djemtë disa herë. Besohet se ‘çelësi’ i suksesit tek ky Manchester United ka pas Ferguson dhe Ole i merr të gjitha idetë për formacionin dhe rreshtimin në fushë nga ai.
