Kombëtarja Shpresa është mposhtur në “Selman Stërmasi” nga Sllovakia në një ndeshje direkte për një biletë në Europianin 2-3. Mënyra si ka ardhur kjo humbje është me të vërtetë për të ardhur keq, pasi kuqezinjtë e Bushit ishin dy herë në avantazh dhe në minutat e fundit u përmbys gjithçka. Më i miri për këtë sfidë ishte Rey Manaj i cili gjeti dy herë rrugën e rrjetës. Pas ndeshje ku ai foli për Rtsh, u shpreh se ekipi luajti mirë dhe meritonte 3 pikë sot, por fusha e rënduar ishte një faktor kundër Shpresave të Kombëtares.
“Ishte një ndeshje e vështirë, në një fushë të vështirë. Terreni nuk ishte shumë normal. Ekipi e nisi shumë mirë 20 minutat e para. Presuam, dhe topin e kishim vetëm ne. Humbëm 3 pikë, që duhet t’i kishim marrë këtu në shtëpi. Fajin nuk e kishte vetëm mbrojtja, kur një ekip pëson apo humbet, gjithçka fillon që nga sulmuesi, që jam unë lart në sulm. Nuk i vendos fajin askujt” – deklaroi Manaj.
