Flamuri i Malit të Zi u valëvit për herë të parë dje, përkrah flamujve të 28 shteteve të tjera anëtare të NATO-s, aleanca më e madhe ushtarake në botë.
Ceremonia e ngritjes së flamurit u zhvillua në zyrat e reja të NATO-s në Bruksel, në prani të sekretarit të Përgjithshëm të NATO-s, Jens Stoltenberg, Presidentit të Malit të Zi, Filip Vujanoviç dhe kryeministrit, Milo Gjukanoviç.
Në konferencën për mediat, Stoltenberg e quajti një ditë historike, për Malin e Zi.
“Vendi juaj e ka fituar pavarësinë vetëm 11 vite më parë, dhe anëtarësimi në NATO do ta forcojë më shumë këtë pavarësi. Dua të përgëzoj qeverinë dhe popullin e Malit të Zi për gjithçka keni arritur dhe do t’ju mbështesim në integrimin euro-atlantik”, deklaroi Stoltenberg
Ndërsa, Presidenti malazez, Filip Vujanoviç tha se, anëtarësimi në NATO do t’i garantojë vendit të tij një të ardhme të qëndrueshme, të sigurt dhe të begatë. Pavarësisht kundërshtive nga Rusia,
Mali i Zi iu bashkua NATO-s zyrtarisht këtë të hënë, pas përmbushjes së formaliteteve të fundit mbi anëtarësimin.
