Policia e Durrësit ka reaguar pas lajmit se drejtorit të Hekurudhës në Durrës, Ani Dyrmishit i ishte vënë tritol. Në një njoftim lëshuar për mediat, policia konstaton se pakos së dyshuar i mungonin disa elementë për të qenë lëndë plasëse. Duket se e gjitha ka qenë një formë kërcënimi ndaj Drejtorit të Hekurudhave.
Ndërkohë, policia vijon hetimet rreth ngjarjes, për veprën penale “Kanosja për shkak të detyrës”.
NJOFTIMI I PLOTË
Sot rreth orës 08:30, në lagjen nr.4, në një parking mjetesh u konstatua një pako, e dyshuar si lëndë plasëse. Në vendin ku u gjet pako, ishte parkuar mjeti tip ‘Pasat’ me targa AA 070 TP, në përdorim nga shtetasi A.D. me detyrë Drejtor i Përgjithshëm i Hekurudhave. Në momentin që ka lëvizur mjetin, ai nuk e ka konstatuar pakon e dyshimtë.
Nga konkluzionet e para të ekspertëve anti-eksploziv rezulton se pakos së dyshuar i mungonin disa elementë për të qenë lëndë plasëse. Grupi hetimor po punon për sqarimin e rrethanave të ngjarjes.
Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale “Kanosja për shkak të detyrës”.
