Që Adriatik Llalla nuk kishte asnjë aftësi, të gjithë e paskemi kuptuar gabim. Sepse shfletimi i fletëve të dosjes së bëmave të tij, na bën që mësojmë se ku qëndron sekreti i lulëzimit të tij dhe familjarëve që notojnë prej vitesh në një luks të pazakontë.
Adriatik Llalla qenka një “magjistar” i vërtetë, i cili paska aftësinë e rrallë për të shndërruar në ar, gjithçka që ai prek me dorë. E sigurisht që ta zotërosh si duhet një mjeshtëri të tillë, të duhet të sigurosh më parë një shkop magjik.
Adriatik Llallës i shkëlqeu ylli shumë herët, si rrallëkujt në këtë vend kur ai kuptoi se shkopi magjik, fshihej nën kolltukun e Inspektorit të Përgjithshëm të Inspektoratit të Lartë të Kontrollit dhe Deklarimit të Pasurive dhe më pas Prokurorit të Përgjithshëm të një vendi si Shqipëria.
Për ta bërë më të prekshme edhe për ju këtë aftësi, Alpenews.al ju ofron sot një shembull fare të thjeshtë nga dosja e z. Llalla.
Këto shkresa që shihni këtu janë fletët e një kontrate për shitblerjen e një apartamenti nga z. Llalla ne Lagjen 13, ose e thënë me gjuhë popullore, në Plazh të Durrësit. Me letra figuron e blerë në datë 19 mars të vitit 2012. Ka një sipërfaqe banimi prej 67.2 metrash katrorë dhe i blerë me një çmim prej 22 milionë lekësh. Në atë kohë z. Llalla ishte Inspektori i Përgjithshëm i ILDKP-së.
Merrte një rrogë prej rreth 160 mijë lekësh në muaj. Ndërsa bashkëshortja e tij merrte një pagë prej rreth 44 mijë lekësh në muaj. Nëse çifti Llalla do të jetonte disa vjet me radhë vetëm duke bërë një jetë krejt normale, me këto të ardhura 22 milionë lekët do t’i duheshin të paktën disa vite për t’i kursyer. Mos harrojmë se ndërkohë kishin bërë edhe investime të tjera me para në dorë, përfshi blerjen e një ullishte prej 3 000 metrash katrorë në Tiranë.
E si të mos i mjaftonin këto, edhe këtë aprtament në plazh e blenë duke derdhur 22 milionë leke cash në dorë, pronarit.
Bukur deri këtu. Po çfarë ndodh më pas?
Pasi e kanë blerë këtë apartament në plazh, që është një investim që presupozohet se për një çift është shumë i rëndësishëm dhe i mirëmenduar, Llalla pasi e bleu më 19 mars 2012, e shet atë vetëm dy javë më pas, më 5 prill 2012. Ky është çasti kur fillon dhe shpaloset aftësia e rrallë prej magjistari pronash i Adriatik Llallës.
Brenda dy javëve, ai jo vetëm arrin që të gjejë blerës në treg, jo vetëm që të bëjë letrat dhe formalitetet e tjera shku a ardh nga Tirana në Durrës për t’u takuar me blerësin, për t’i treguar shtëpinë, për t’i mbushur mendjen sesa bukur është ta kesh këtë pronë në plazh, etj, etj por ai ka patur fuqinë e mbinatyrshme që t’i mbushi mendjen për t’ia shitur plot 2.2 herë më shtrenjtë seç e kishte blerë. Duke ia rritur vlerën në vetëm dy javë, me 220% pronës së tij, duke e shitur apartamentin me çmimin e një vile të asaj kohe, plot 50 mijë dollarë.
Pas kësaj, a ka më njeri që nuk beson në aftësitë e jashtëzakonshme prej magjistari pronash të Adriatik Llallës?! Se mos mendoni se ka diçka tjetër që fshihet prapa trukut të tij, që ja kalon edhe prestigjatorit më të madh në botë David Copperfield?!
Jo. Adriatik Llalla është thjeshtë shumë i zoti. Si një njeri i zhytur në raste të mëdha korrupsioni, siç e përcaktoi Sekretari Amerikan i Shtetit Rex Tillerson. Shumë shpejt, gjithë shqiptarët do ta mësojnë trukun e magjistarit tonë të rremë./Alpenews.al
