E kishte paralajmëruar para shumë javësh dhe e kishte kërkuar vazhdimisht largimin nga posti i trajnerit por i ishte refuzuar nga presidenca. Tani duket se aventura e Gugash Maganit tek Teuta përfunduar. Peqinasi nuk ka drejtuar seancën e sotme stërvitore të bregdetarëve, ndërsa pritet të zyrtarizojë largimin e tij nga skuadra që drejton prej më tepër se një viti. Duket se tani mungon vetëm zyrtarizimi për këtë ndryshim në stolin e bregdetarëve.
Ndërkohë, pritet që vendin e Maganit te Teuta ta zërë pikërisht Stavri Nica, që do të ndihmohet nga Ilir Biturku. Nica drejtoi Laçin në javët e para të Superiores, ndërsa më pas dha dorëheqjen, për shkak të kontestimeve që kishte për merkaton e kryer nga klubi. Nga ana tjetër, Magani pritet të marrë drejtimin e Partizanit, por ende askush nga palët nuk e pranon zyrtarisht këtë hipotezë.
