Kreu i PD-së po mban një fjalim në protestën masive, e cila nisi në orën 12:00. Basha theksoi se qëndresa e 85 ditëve, është fillimi i Republikës së Re.
FJALA E BASHËS:
“Tre muaj më parë u bashkuam në këtë shesh për ti thënë ndal krimit dhe për të kërkuar zgjedhje të lira si themeli i demokracisë. U bashkuan në këtë shesh për 85 ditë e 85 netë me radhë, shqiptarë nga e gjithë Shqipëria, profesorë, artistë, studentë, gjimnazistë, në betejën tonë për demokraci të vërtetë.
Ajo që nisi si rruga e bashkimit i vetmi shteg për miliona shqiptarë të mashtruar. Ajo që nisi si një kërkim thellë në shpirtrat tanë për rrugën e daljes së gjendjes së mjerë, ajo u kthye në motorin më të fuqishëm të shpresës që vrau frikën anë e mbanë vendit. Që mbushi çdo shqiptare e çdo shqiptare të ndershme përmes besimit në Zot, shpresën dhe vendimin e madh për ta shporrur dëshpërimin, për të mposhtur frikën, për ta përmbysim Republikën e Vjetër.
Ja tek jemi sot në një bashkim që nuk e ka parë Shqipëria, nuk e ka parë Ballkani, nuk e ka parë Evropa, nuk e ka parë bota. Ky nuk është thjesht bashkimi kundër qeverisjes, kjo është shpallja e besimit të vetja juaj dhe të gjithë bashku te Shqipëria jonë. Këtu keni ardhur sepse besoni tek Republika e Re. Nuk keni ardhur sepse besoni te një njeri, as vetëm te një parti, sepse këto 3 muaj qëndresë janë ripërtëritja e besimit të çdo shqiptari te vetja e vet, te familja e vet dhe të gjithë bashku te njëri-tjetrin. Zoti na e jep këtë besim, nuk ka njeri në tokë të na e marrë!
Nuk jemi mbledhur kaq shumë sot për një ndryshim të vetëm por për ndryshimin më të madh në historinë e shqiptarëve, gjithçka duhet të ndryshojë dhe falë qëndresës tuaj, me ndihmën e Zotit gjithçka do të ndryshojë, asgjë nuk do të jetë më si më parë.”/ TIRANA TODAY
