Ishte rezultat që pritej. Atletja Luiza Gega nuk ka arritur të sigurojë një vend për në finalen e 1500 metrave, në Botërorin e sallave të mbyllura që po zhvillohet në Birmingam të Britanisë së Madhe. Para nisjes për në Angli atletja publikoi foto ku tregonte se sa e lënë pas dore ishte nga shteti atletja, ku edhe uniformën ishte e detyruar që ta siguronte vetë. Por problemi më i madh është kushtet e stërvitjes, pasi ajo vetë është shprehur se mund të siguroj uniformën, por jo një pistë tartari ku të stërvitet.
Luiza Gega nuk arriti tw realizonte objektivin. Arsyeja? “Për fat të keq nuk munda të kualifikohem për në finalen e garës së 1500 metrave në Botërorin e Birmingamit. E dija që do të ishte e vështirë, pasi edhe për mua ky ka qenë një vit i vështirë në stërvitje. Të bëja fazën përgatitore në Tiranë, pa infrastrukturë minimale nuk ka qenë aspak e lehtë. E megjithatë, unë isha gjatë gjithë garës me më të mirat e botës dhe kjo më bën të ndihem e kënaqur dhe krenare për çfarë kam arritur”, thotë Luiza Gega.
Megjithatë, kampionia e Shqipërisë, që gjithnjë na ka mësuar me medalje e fitore, nuk tërhiqet pas në rrugën e saj dhe premton se do të tregojë se sa vlen në eventet e ardhshme ndërkombëtare. Ndërkohë që bën edhe një apel për shtetin, që të hedhë më shumë sytë nga sporti. “E di që kam mundësi për më shumë, ndaj jam e motivuar për çfarë do të sjellë sezoni i verës, ku kam sërish shumë gara të rëndësishme përpara. Ndaj, ndihem gati për të filluar stërvitjen, ndërkohë që shpresoj që vëmendja nga shteti të ndryshojë sadopak”, deklaroi në faqen e saj zyrtare “Facebook” dhe “Instagram” atletja Luiza Gega, një ikonë e sportit shqiptar dhe e atletikës.
