Pep Guardiola i surprizoi të gjithë një ditë më parë, kur tha se e ardhmja tij si trajner klubesh do të ndërpritet pas dy vitesh, kur të mbarojë kontrata me Mançester Sitin. Më tej do të shikojë mundësinë për të marrë drejtimin e një kombëtareje. Kaq mjaftoi që të krijoheshin aludimet për të ardhmen e Guardiolës.
Teksa ishin të shumtë ata që folën duke filluar nga ish-futbollistë, ekspertë futbolli e trajnerë të njohur, njëri prej tyre, Luis Enrike i ka habitur të gjithë.
Në ditën e prezantimit të lojtarëve të grumbulluar në sfidat eliminatore të Botërorit, Enrike u shpreh se do të dëshironte shumë të shikonte Guardiolën si trajner të Spanjës, pasi vendi nuk do të kishte një trajner më të mirë se ai.
“Do të dëshiroja që Guardiola të bëhej trajner i Spanjës. Do të ishte diçka e mirë në qoftë se kombëtarja do të stërvitej në gjurmët e Guardiolës. Nuk besoj se do të kishte trajner më të mirë për vendin se ai”, ishin fjalët e Luiz Enrikes.
