Kryeministri Edi Rama ka marrë pjesë në mbledhjen e Task Force-s për të raportuar në Zyrën Operacionale të Situatës.
Gjatë fjalës së tij, kryeministri Rama vlerësoi punën e Policisë së Shtetit kundër kultivimit të kanabisit dhe goditjen e grupeve kriminale, ndërsa shtoi se Shqipëria duhet të shpëtojë një herë e mirë nga ajo që ai e quan “njolla jeshile e turpit”.
“Ana tjetër e medaljes është e gjitha për t’u parë deri në fund, në kuptimin e evidentimit, ndalimit dhe ndëshkimit të elementëve kriminalë që kanë përfituar në mënyrë të paligjshme shuma të mëdha parash dhe që posedojnë asete kriminale.
Nuk duhet pastruar Shqipëria vetëm nga kanabisi, por edhe nga kriminelët që kërcënojnë jetën e njerëzve të zakonshëm të këtij vendi. Suksesi i qartë që po shihet, dhe njolla jeshile e turpit që po hiqet, tregojnë vullnetin e hekurt të policisë shtetit, dhe partneritetin e mirë me autoritetet italiane.
Është koha ta pastrojmë Shqipërinë jo vetëm nga kanabisi, por edhe nga këto mikrobe të gjalla që kërcënojnë sigurinë e njerëzve të zakonshëm të këtij vendi.
Policia ka informacionin e duhur, ka emra, bëma, lidhje, lëvizje të këtyre lloj mikrobeve që të bëjnë të mundur operacionin super të suksesshëm në këtë drejtim për t’i dhënë një mesazh njerëzve të këtij vendi se koha kur shteti ishte vetëm një alternativë e sigurisë së tyre ka ikur. Të goditen elementet brenda policisë së shtetit që janë të lidhur dhe të nënshtruar ndaj këtyre elementeve. Ndaj feudalëve që shqetësojnë jetën komunitare duke mbajtur me vete pasaportën e zymtë të veprave kriminale dhe duke qene hije për njerëzit e këtij vendi,” tha Rama, duke paralajmëruar edhe goditjen e zyrtarëve të policisë të përfshirë në akte të paligjshme.
