Kryeministri Edi Rama ka marrë pjesë në mbledhjen e Task Force-s, e cila ka raportuar në Zyrën Operacionale të Situatës lidhur me luftën kundër kanabisit në vend.
Gjatë fjalës së tij, kryeministri vlerësoi punën e bërë nga Policia e Shtetit kundër kultivimit të kanabisit, ndërsa nuk ka harruar t’i japë një porosi të drejtpërdrejt kreut të Policisë së Shtetit, Haki Çakos.
Rama i kërkoi Çakos që Policia e Shtetit të ketë përparësi kapjen e kokave të grupeve kriminale dhe më pas sekuestrimin e aseteve.
“Zoti drejtor, besoj që duhet të angazhoheni shumë fuqishëm për një shqetësim të opinionit publik lidhur me fenomenin që ka të bëjë me kthimin në përparësi të goditjes së krerëve të këtyre grupeve kriminale dhe të sekuestrimit të aseteve. Policia e Shtetit ka bërë progres gjatë këtyre muajve që jemi në detyrë por jemi të vetëdijshëm se në goditjen e kokave dhe sekuestrimin e aseteve ka shumë për të bërë.
Të kapen kriminelët, pastaj bimët, jo bimët pastaj shohim e bëjmë për kriminelët.
Kemi rënie drastike në shifra krejt minimale të kultivimit. Një element kuptim plotë është aftësia e Policisë së shtetit, e cila paralelisht me pastrimin e kanabisit nga harta e Shqipërisë, po kryen edhe pastrimi e radhëve të veta të punonjësve të implikuar në kultivimin e drogës. Nga ana tjetër ndani me mua edhe shqetësimin që ky proces duhet të vazhdojë deri në fund dhe muajt që kemi përpara janë muaj rreziku dhe duhet të punohet intensivisht. Vlen të vlerësohet edhe roli i Prokurorisë në përgjigjen e shpejtë ndaj Policisë së Shtetit”, tha Rama./ Tirana Today
