Protesta e banorëve të Unazës së Re ka hyrë tashmë në muajin e dytë. Sonte kësaj proteste i është bashkuar edhe analisti Fatos Lubonja.
Ky i fundit tha se çështja e Unazës së Re është një aferë e pastër korruptive, ndërsa tha se ai i është bashkuar protestës si një qytetar i thjeshtë.
Lubonja bëri thirrje për bashkim të qytetarëve në mbështetje të protestuesve.
“Duket sheshit që është një projekt kriminal. Unë kam ardhur këtu edhe për të materializuar një gjë që e kam thënë dhe në media, kjo nuk është çështje vetëm e Astirit, por një çështje kombëtare. E dyta për të thënë se këtu duhet të jemi që të gjithë. I bëj thirrje te gjithëve dhe u them që kjo është një çështje e të gjithëve. Po ashtu kam ardhur për t’u dhënë kurajo këtyre, siç ata na kanë dhënë ne, pasi rezistenca e tyre na ka dhënë shumë kurajo. Po u them një shembull që ka ndodhur në një vend tjetër, ku një aktiviste për të mos lejuar prerjen e një peme, hipi në pemë dhe qëndroi dy vite aty dhe ajo pemë nuk u pre, pasi ajo rezistoi. Po nuk u bashkuam të gjithë bashkë do na hanë një nga një, duhet të bashkohemi si këtu si tek teatri dhe në Shkozë, ku që ka projekte korruptive dhe qeveria duhet rrëzuar”, tha analisti Lubonja.
Ditën e sotme IMT ka shembur një banesë dy katëshe në Laprakë, në kuadër të projektit duke shkaktuar tension mes policisë e familjarëve.
