Analisti Fatos Lubonja thotë se faktori ndërkombëtar nuk është më i besueshëm në qëndrimet që mban, lidhur me situatën aktuale politike në Shqipëri.
Ai vë në dukje se, ndëkombëtarët janë më shumë të interesuar për qëndrueshmërinë e vendit, sesa për demokracinë e saj, ndërsa thekson se Basha, pavarësisht se po artikulon një kauzë të drejtë, nuk ka mbështetje masive nga qytetarët.
“Mendoj se çadra ndonëse ka të drejtën e vet në lidhje me pretendimet, i mungon mbështetja e lëvizjes popullore, pra populli i madh dhe ndërkombëtarët. Shkaqet sepse nuk i ka me vete, mendoj se ndahen sërish në dysh, se kjo opozitë ka qenë në pushtet dhe ka humbur kredibilitetin, ndërsa ndërkombëtarët i kanë dhënë një lloj besimi kësaj qeverie dhe ata janë gjithnjë mbrapa nesh në diagnostikimin e sëmundjeve tona. Kështu e shoh mbështetjen e ministrit gjerman për Ramën. Faktori ndërkombëtar ka kohë që ka humbur një lloj kredibiliteti, i mëshojnë më shumë stabilitetit se sa demokracisë. Ndërkombëtarët gjithnjë i japin mbështetje qeverisë, që do të thotë se shqiptarët duhet ta marrin vetë situatën në duart e tyre”, u shpreh Lubonja, në një intervistë për News 24.
