Trajneri i kombëtares shqiptare Christian Panucci befasoi me listën e lojtarëve të grumbulluar për miqësoren me Jordaninë dhe ndeshjen e kthimit me Izraelin të vlefshme për Ligën e Kombeve. Në këto dy sfida do të mungojë kapiteni Ansi Agolli. Në dy ndeshjet e fundit ai ishte grumbulluar, por nuk u aktivizua asnjë minut përball Izraelit në “Elbasan Arena” dhe ndaj Skocisë në transfertën e Glasgow.
Por pse nuk grumbullohet Agolli nga Panucci? Mbrojtësi luan për ekipin azer të Qarabag, i cili përballet sonte me Arsenalin në kuadër të Europa League dhe futbollisti kuqezi aktivizohet titullar. Trajneri italian pretendon se është duke ndërtuar një ekip për të ardhmen dhe mosha e Agollit nuk premton që ai të jetë në formë në Europianin 2020.
Por duke parë që kombëtarja shqiptare ka nevojë më shumë se kurrë për eksperiencën e tij dhe të disa lojtarëve të tjera, Panucci duhet ti lejë mënjanë eksperimente dhe provat. Por më shumë se lëvizja taktike, apo mosha e Agollit, përjashtimi i tij këtë herë lidhet me deklaratën që dha pas humbjes me Skocinë.
Nuk e kishim parë ndonjëherë një kapiten kuqezi të kritikojë trajnerin, por Agolli e bëri duke u shprehur: Ne ia dhuruam fitoren Skocisë, më shumë se e fituan ata ndeshjen. Por të lësh jashtë një futbollist që luan në nivele të larta si Europa League dhe përballë një ekipi si Arsenal, nuk ka justifikim për teknikun Panucci. A janë ndeshjet e kombëtares shqiptare më të forta se të përballesh me londinezët e Arsenalit?
