Deputeti i LSI-së, Luan Rama ka komentuar situatën e banorëve të Astirit, të cilët kundërshtojnë vendimin për të prishur ndërtesat pa marrë më parë dëmshpërblimet.
I ftuar në studion e “Opinion” në News 24, Rama bëri një deklaratë të fortë, teksa u bëri thirrje qytetarëve të vijnë dhe të nxjerrin deputetët nga Kuvendi.
“Në protestë tek Unaza e Re në formë solidariteti me qytetarët. Mirë do ishte të ishte tek ata edhe deputetët e mazhorancës. Unë jam pro përmirësimit, zhvillimeve infrastrukturore. Në rastin konkret jemi përballë një arbitrariteti. Shteti nuk po ndjek standardet ligjore, pse iu kërkon qytetarëve të respektojnë këto standarde ku qeveria nuk i zbaton. Kemi në prapavijë interesa korruptive në këtë zonë.
Nëse jemi në një fazë, e cila nuk ka një leje ndërtimi. Duhet të dëmshpërblehen paraprakisht, ky është një detyrim ligjore. Të dëmshpërblehen për dëmin që iu shkaktohet. T’ju jepet shuma që mund të marrin më pas një shtëpi tjetër. Kemi vetë kryeministrin i cili do të deklaronte më parë se nuk do të prishen shtëpitë. Askush nuk është kundër ligjin, sjellja, qasja dhe praktika”, tha Luan Rama ndër të tjera.
