Nënkryetari i Lëvizjes Socialiste për Integrim, Luan Rama, e cilësoi si të njëanshëm qëndrimin e ministrit të Jashtëm gjerman, Sigmar Gabriel, mbi krizën politike, kur u pyet për deklaratën e këtij të fundit se opozita duhet të rikthehet në Parlament.
Sipas nënkryetarit të LSI-së, krizat politike, që prodhohen nga politika shqiptare, duhet të zgjidhen brenda saj.
“Çdo njëanshmëri nuk ndihmon në zgjidhjen e situatës. Problemi është këtu dhe duhet të zgjidhet midis shqiptarëve, midis forcave politike. Kemi krijuar pa fund marrëzi politike dhe ka ardhur koha për të marrë përsipër përgjegjësi. LSI e ka bërë të qartë se interesi i koalicionit PS-LSI nuk është më i rëndësishëm, sesa interesi i Shqipërisë”, u shpreh Rama në një konferencë për shtyp.
Luan Rama shtoi se “duhet t’i thërrasim arsyes dhe përgjegjësisë dhe t’i largohemi marrëzisë. LSI, gjithnjë ka apeluar për të ushtruar gjithë presionin për të arritur në një dialog politik për të pasur zgjedhje të lira dhe të ndershme”.
