Ministri i Drejtësisë, Petrit Vasili, ka sulmuar ashpër kryeministrin e vendit Edi Rama.
Duke folur në emër të LSI-së, Vasili ka thënë se rruga që po ndjek Rama për të hyrë vetëm në zgjedhje, të çon drejt diktaturës dhe autokracisë.
Vasili ka thënë, në një intervistë për News 24, se vendi për momentin nuk është në dilemën për të zgjedhur mes së majtës dhe të djathtës, por mes demokracisë dhe diktaturës.
Ai ka kritikuar Ramën, edhe për mënyrën e komunikimit me opozitën dhe thirrjet e tij për dialog.
Sipas Vasilit, Rama përdor deklarata konfliktuale karshi opozitës.
Ai tha, ndërkohë, se LSI nuk mund ta kuptojë dot një fushë futbolli, ku luan vetëm një skuadër.
Vasili i quajti një grusht të madh të gjitha “aventurat e personalizuara” për të shkuar i vetëm drejt zgjedhjeve.
Vasili ka komentuar edhe qëndrimet e fundit të Metës, duke thënë se ai ka reaguar në atë mënyrë, pasi zgjedhjet janë më të rrezikuara se kurrë më parë.
“Zgjedhjet janë më të rrezikuara se kurrë më parë.
Qëndrimi i tij ishte për të thënë se kemi një krye çështje dhe zgjidhja e saj është krye thënia e të gjitha zgjidhjeve.
Pa zgjidhjen e saj nuk mund të kemi zhvillim ekonomik, reformë në drejtësi.
Deklarata e Metës u bë pikërisht për të parandaluar këtë fenomen. Ai bëri thirrje për përgjegjshmëri të re politike”, tha Vasili.
“Meta u shpreh qartë që jemi të majtë, por mes demokracisë dhe diktaturës ne zgjedhim demokracinë, nisur edhe nga një klimë e egër konfliktualiteti e mbajtur në mënyrë të veçantë nga mazhoranca.
Është e dëmshme edhe retorika e kryeministrit, që tregon një protagonizëm konfliktual të panevojshëm”, vijoi ai.
Vasili ndërkohë komentoi edhe qendrimin e Ramës për kërkesën e opozitës, e cila thotë se zgjedhjet e 18 qershorit duhen shtyrë.
Sipas Vasilit, ky qëndrim kategorik i Ramës për të mos shtyrë zgjedhjet, është i gabuar.
Vasili tha se zgjedhjet i ka shtyrë edhe Ramiz Alia në 1991, dhe Sali Berisha në 2007-ën.
“Shpatullat e Ramës janë të vogla për të mbajtur destabilitetin”, tha ai.
