Kandidati për deputet i LSI-së në Qarkun Lezhë, Viktor Tushaj, reagoi pas incidentit të armatosur në një qendër votimi në Shëngjin, ku mbeti i plagosur një komisioner i LSI-së.
Gjatë një prononcimi për gazetarët, Tushaj i bëri thirrje kryeministrit të zbrapsë kriminelët e rilindjes, siç i quajti ai, sulmuesit e sotëm të komisionerit.
“I bëj thirrje Kryeministrit, të largojë nga qafa e shqiptarëve rilindasit dhe kriminelët e saj. Gjithashtu i bëj thirrje Policisë, që përpara se të shkojë te viktima, të marrë të gjitha provat materiale nga vendi i ngjarjes, ku ka edhe filmime, dhe të kapë kriminelët që po dhunojnë herë pas here qytetarët”.
Sa i përket identitetit të autorit të këtij krimi, Tushaj tha se “emrin e tij e dinë qytetarët e Lezhës dhe i dhunuari, por për çështje të hetimit nuk e bëj të ditur para kamerave por pranë organeve kompetente të hetimit”.
Tushaj tha se fatmirësisht gjendja e të plagosurit është e mirë.
