Nga mbledhja e grupit pritet vendim për seancën e nesërme për zgjedhjen e Presidentit. Mbledhja e grupit vjen pas lajmit se kryetari i Kuvendit, Ilir Meta, po mbledh firmat e deputetëve për t’u paraqitur si kandidatura kryesore për Presidentin e vendit.
Me sa duket, tema kryesore e diskutimit është strategjia për të “blerë” sa më shumë deputet, madje, edhe ata që vijnë nga radhët e Partisë Socialiste në sigurimin e votave të mjaftueshme për t’u zgjedhur në krye të shtetit.
Kandidimi i kryetarit të LSI-së për postin e kreut të shtetit, vjen në situatën e rënduar politike dhe pas ultimatumit të Gramoz Ruçit se “durimi u sos”. Kreu i grupit parlamentar, Gramoz Ruçi sfidoi hapur Metën, në momentin kur tha se PS i ka 71 vota dhe mund të zgjedhë Presidentin pa LSI-në.
Meta, me sa duket, edhe një herë po vetofrohet si zgjidhje e ngërçit politik në vend, pas kërcënimeve të Ruçit se do të ketë zgjedhje të parakohshme për 45 ditë, në qoftë se nesër nuk zgjidhet Presidenti.
