Me premtimin se i siguron mbështetje në fushatën zgjedhore dhe në procesin e administrimit të procesit zgjedhor, nëpërmjet komisionerëve të saj, si dhe prespektivë të qartë në administrim në qeverisjen e ardhshme, LSI-ja ka joshur PDS-në e Paskal Milos për bashkëpunim para dhe pas zgjedhor.
Kreu i PDS-së Paskal Milo, gjatë konferencës së përbashkët për shtyp me kreun e LSI-së Vasili, pas nënshkrimit të marrëveshjes, deklaroi se synimi i bashkëpunimit është maksimizimi i rezultatit zgjedhor të dy partive dhe se skena politike aktuale ka nevojë për këtë nivel bashkëpunimi.
Ai tha se ka marrë garanci të plotë nga LSI-ja se do të mbeshtetet në fushatë dhe sidomos në administrimin e procesit të numërimit të votave e më pas në një prespektivë të mundshme për bashkëqeverisje.
Sa i përket partive të tjera që deklaruan dje bashkimin e votave me PS-në, Milo tha se me këtë veprim ato kanë humbur integritetin dhe identitetin e tyre.
Milo përcolli mesazhin tek elektorati i partisë së tij, se pas kësaj marrëveshjeje duhet të shohin tek LSI, përvese një aleat, një garanci për zgjedhje të lira dhe të ndershme.
